Дали замрзнатите овошја и зеленчуци се еднакво здрави како свежите?
Сигурно некогаш сте застанале во делот за замрзнати овошја и зеленчуци во некој маркет, двоумејќи се дали да купите замрзнати или свежи. Доколку се препознавте, го имаме одговорот.
Покрај тоа што се подостапни (и понекогаш поисплатливи), замрзнатите овошја и зеленчуци се подеднакво или похранливи.
Пред замрзнување, зеленчуците и овошјата се берат и бланшираат. Процесот на бланширање е од клучно значење бидејќи ги деактивира ензимите во производот. Овие ензими придонесуваат за губење на хранливите материи и промена во вкусот. Бланшираните производи потоа се замрзнуваат и на тој начин ги зачувуваат сите вредни хранливи материи.
Едноставно, кога ќе одлучите да ги купите првите сезонски јагоди, кои патем се најскапи, сетете се дека истите претрпеле долго патување до локалниот пазар бидејќи доаѓаат од подалечни земји, најчесто од Шпанија. Попатно го изгубиле вкусот и дел од хранливата вредност. Но, тоа не е случај со замрзнатите јагоди кои ги зачувале сите хранливи материи со замрзнување веднаш по берењето.
Студија од 2013 година спроведена на Универзитетот Честер покажа дека свежите боровинки по три дена поминати во фрижидер губат значителен дел од витамин Ц, додека замрзнатите боровинки генерално имаат повисоки концентрации на витамин Ц.
Универзитетот Калифорнија, Дејвис објави слична студија, откривајќи дека „содржината на витамини во замрзнатите производите биле споредливи и повремено повисоки отколку кај свежите производи“.
Затоа, замрзнатите производи можат да бидат дел од препорачаните порции зеленчук и овошје дневно. Освен што ги содржат саканите хранливи материи, тие го забрзуваат процесот на подготовка и конзумација.