ЦИВИЛ со осуда на пропагандните спотови со навредлива и понижувачка содржина
На самиот почеток од изборната кампања, се појавија видео спотовите на политичките партии со кои тие се обидуваат да ги убедат граѓанките и граѓаните да гласаат за нив. ЦИВИЛ во целост ги поддржува реакциите во јавноста за првиот спот на ВМРО-ДПМНЕ во кој граѓаните се претставени со свиткани рбети, што претставува навреда, понижување, потсмевање, угнетување, деградација и дискриминација на луѓето воопшто, но особено на жените и на лицата со попреченост.
На третиот ден од изборната кампања, јавноста имаше прилика да види и втор спот во кој лидерот на ВМРО-ДПМНЕ, Христијан Мицкоски, им нуди иднина на младите преку партиска книшка.
-Накусо, во најновиот спот, една млада госпоѓа чекира авионски билет на аеродром за да замине „каде било, само не тука”. Во тој момент, се појавува Мицкоски повторно во улога на спасител, а билетот ѝ го заменува со партиска книшка. Исто како во првиот спот, кога со само еден допир успеа да исправи подгрбавена девојка која турка бебешка количка, што е крајно понижувачки на родова основа- наведуваат од ЦИВИЛ.
Во новиот спот, партиската книшка Мицкоски повторно ја враќа во „мода” и многу јасно, пред целата јавност, дава до знаење дека, ако дојде на власт, партиската книшка повторно ќе отвора и затвора врати.
-Останува отворено прашањето, дали Мицкоски најавува враќање на старите методи на уцени и закани врз основа на партиска припадност? Легитимни се и прашањата поставени на социјалните мрежи и во јавноста за тоа дали тие што немаат книшка од ВМРО-ДПМНЕ ќе имаат тука иднина доколку Мицкоски победи на изборите?- прашуваат од ЦИВИЛ.
ЦИВИЛ најостро реагира на ваквите предизборни спотови кои се истовремено понижувачки за луѓето, а особено за лицата со попреченост и за жените. Ваквите спотови можеби не испраќаат директна порака, меѓутоа во најмала рака поттикнуваат создавање на предрасуди и говор на омразата.
ЦИВИЛ упатува апел до сите чинители во изборниот процес во иднина да внимаваат какви пораки испраќаат со нивните предизборни пропагандни и медиумски продукти. Навреди, понижување, дискриминација, сексизам се крајно неприфатливи начини на политички натпревар!
ЦИВИЛ веќе побара од политичките партии кампањите да ги водат фер, демократски и безбедно, да се однесуваат одговорно кон јавноста и кон законите и демократските стандарди. Од политичките партии се очекува црната пропаганда да ја заменат со позитивни пораки и со идеи кои произлегуваат од нивните програми, за граѓаните да можат да имаат јасна слика за политичката понуда, по што ќе донесат информиран избор на денот на гласањето.