Циркус во Германија ги замени животните со холограми
Наместо вистински слонови, лавови, коњи и други животни, германскиот циркус „Roncalli“ веќе користи нивни холограми, односно тродимензионални верзии на слики создадени со ласерска светлина.
Германскиот циркус „Roncalli“ ги забавува своите посетители со изложби на животни, акробатика и циркусна уметност од 1976 година и е еден од најпозатите циркуси во светот.
Но, во последните години тие се префрлија на посовремени техники за да ги покажат своите уникатни таленти.
Во обид да се избегне традиционалната презентација на животните, циркусот почна да користи холограми наместо вистински животни.
Шоуто се одвива како и обично, само што наместо вистински животи се појавуваат „3D“ холограми и проекции.
„Ние завршивме добра работа. Направивме холографски круг бидејќи сцената во циркусот е кружна“, изјави Бернхард Пол, основач и директор на циркусот, додавајќи дека преминот кон дигитални животни е добро прифатен од посетителите ширум светот.
Се повеќе зоолошки градини и циркуси ја менуваат традиционалната практика и систем на работа со животни. Слични промени се случуваат во Ирска, Италија и Индија, пишува „IFL Science“.