Црна Гора се приближува до клучниот момент во својот долгогодишен пат кон членство во Европската Унија, откако земјите членки дадоа зелено светло за подготовка на пристапниот договор – документ што го дефинира влезот во Унијата, јавува Еуроњуз.

Овој чекор означува премин во најкомплексната етапа од процесот, каде паралелно со изработката на договорот, земјата ќе мора да ги финализира реформите и да ги затвори преостанатите преговарачки поглавја. Иако не значи автоматско членство, сигнализира дека процесот влегува во завршна фаза.

Од Подгорица порачуваат дека станува збор за „финален круг“ од повеќегодишните преговори, кои започнаа уште во 2012 година. Земјата има кандидатски статус од 2010 година и досега ги има отворено сите поглавја, додека дел од нив се веќе привремено затворени.

Во Брисел, Европската комисија ја гледа Црна Гора како најнапреден кандидат од Западен Балкан, со можност за членство во наредните неколку години – условено со резултати, а не со рокови.