Познатата красула, или „билка на парите“, е една од најатрактивните собни билки, ценета по својот декоративен изглед и меснати листови, но и по симболиката што ја носи. Се верува дека внесува хармонија, просперитет и добра енергија во домот, а многумина ја избираат и поради тоа што не бара комплицирана нега.

Основни правила за негата:

Светлина: Красулата сака светлина и најдобро расте на прозорци свртени кон југ или запад. Недостатокот на светлина го забавува растот, додека премногу сонце може да ја промени бојата на листовите.

Вода: Билката подобро поднесува суша отколку премногу вода. Во топлите месеци, полевајте само кога земјата во саксијата речиси сосема ќе се исуши. Зимо, залевањето сведете на минимум. Меки или набрани листови се знак дека е време за вода.

Одржување на земјата: Повремено растресете ја земјата за да дојде воздух до коренот и за да проверите дали има влага.

Облик и пресадување:

Красулата расте како мало дрво со цврсти, дрвенести гранки. Во пролет може да се скратат гранките за убав и урамнотежен облик. Кога ќе порасне, пресадете ја во поголема и потешка саксија со пропустлив супстрат подобен за саксиски растенија.

Размножување:

Красулата се размножува лесно, отсечете дел од стеблото со неколку листови, оставете го резот чист и засадете го во погодна земја на светло место. Растението брзо ќе пушти корени.

Со малку трпение и правилна нега, билката на парите може долго да го краси вашиот дом, а со идеални услови дури и да ве изненади со цутење.