Англискиот премиерлигаш Челси би можел да ја одбележи завршницата на летниот преоден рок бидејќи е подготвен да го собори рекордот за најскап трансфер на дефанзивец во историјата на фудбалот.

Само еден ден откако го официјализира трансферот на Марк Кукуре ља од Брајтон за кого плати 55 милиони фунти плус пет милиони во бонуси, Челси е подготвен да го собори рекордот што го држи Хари Мегваер и да го направи најголемиот трансфер на дефанзивецот.

„Сините“ кои планираат ремонт на одбраната, утринава ја зголемиле понудата за дефанзивецот на Лестер, Весли Фофана на неверојатни 85 милиони фунти. Доколку Лестер ја прифати понудата, Челси ќе го собори рекордот на Манчестер јунајтед кој исто така на „лисиците“ им плати 80 милиони фунти за Хари Мегваер.

Фофана кој сака да си оди од Лестер, би требало да биде замена за Андреас Кристенсен кој по завршување на договорот потпиша за Барселона, додека Антонио Ридигер беше заменет со Калиду Кулибали кој дојде од Наполи.

Челси покрај Кукуреља и Кулибали, летово го доведе и Рахим Стерлинг, а работи и на трансферот на Френки де Јонг од Барселона.