Целосна посветеност: Остин Батлер не го видел семејството три години додека се подготвувал за „Elvis“
Американскиот актер Остин Батлер откри дека не го видел своето семејство три години додека се подготвувал за улогата на кралот на рокенролот во музичката драма „Elvis“, објави „Варајети“.
Батлер имал околу една и пол година да се подготви пред да почне снимањето на биографскиот филм на режисерот Баз Лурман.
„Се подготвував со режисерот Баз Лурман, а потоа отпатував во Австралија на снимање. Со месеци не разговарав со никого. Размислував само за Елвис и цело време го имитирав“, изјави тој во интервјуто за „Варајети“.
„Бев фокусиран исклучиво на улогата. Дури и цело време зборував како него, па еднаш разговарав на ист начин на телефон со сестра ми, а таа ме праша што не е во ред со мене“, додаде Батлер.
Филмот на Лурман го документира метеорскиот подем на Присли до суперѕвезда во педесеттите години на минатиот век и ја истражува сложената врска на музичката легенда со неговиот менаџер Том Паркер, кој го игра актерот Том Хенкс.
Батлер и претходно зборуваше за ефектот на улогата на Елвис врз него. Тој призна дека речиси целосно го „изгубил контактот“ со себе и со сопствената личност.
Но, истакна дека не жали за ништо и дека е подготвен да направи сѐ за успехот на филмот. Во таа намера успеа, бидејќи „Елвис“ оствари профит од 276 милиони долари.
Во интервјуто за „Варајети“, тој исто така рече дека улогата на Елвис му помогнала да излезе од својата комфорна зона.
„Претходно не танцував и не пеев јавно бидејќи бев многу срамежлив“, признал тој.