Откако мрежите мируваа во Разград (0:0), денеска во реваншот од третото квалификациско коло во Лигата на шампионите фудбалерите на Ференцварош дома убедливо со 3:0 го совладаа Лудогорец.

Во шестата минута на стадионот во Будимпешта играчите на Лудогорец постигнаа гол преку Чочев, но истиот беше поништен поради офсајд.

Во 38 минута Унгарците поведоа со голот на Варга по асистенцијата на Отвос. Предноста беше зголемена во 79 минута со вториот погодок на Варга, овојпат во улога на асистент беше Грубер.

Конечниот епилог го постави Шалаи во 86 минута по асистенцијата на Тот.

Така, сега е познато дека бугарскиот Лудогорец ќе биде противникот на Шкендија во плеј-офот на Лига Европа.

Македонскиот првак ќе биде домаќин на првиот дуел на 21 август во Скопје, а реваншот на 28 август 2025 во Разград.

Противник на Ференцварош во плеј-офот на ЛШ ќе биде Карабах од Азербејџан кој беше убедлив против тетовските „црвено-црни“.