Со постојан притисок до Министерството за образование и наука, до Генералниот секретаријат на Владата и другите државни органи се бара дислоцирање на Бирото за развој на образованието (БРО), при што ФИНКИ се дрзнува да дава „произволни“ решенија за Бирото, а што се од суштинско значење за институцијата, само за да реши сопствен „просторен проблем“ и тоа „привремено“, реагираат од БРО на барањето на Факултетот, да се изврши релокација на Бирото.

– Институцијата повеќе од 40 години е сместена во „привремени“ објекти/бараки во сопственост на државата за кои домаќински се грижи и ги одржува за непречено одвивање на работните задачи во нејзина надлежност и од чија реализација зависи и секојдневната работа на училиштата, наставниците, директорите на училиштата, како и на другите институции и организации од областа на образованието, се вели во реакцијата.

Од Бирото порачаа дека ќе продолжат да си ја вршат работата на истата локација, сè додека не се изгради објект според потребите и надлежностите на институцијата.

– Исто така, ги информираме Министерството за образование и наука, Владата и сите други надлежни институции дека нема да прифатиме никакво решение во врска со просториите на Бирото за развој на образованието, доколку во процесот на изнаоѓање решение не бидат вклучени претставници од Бирото и не бидат земени предвид сите потреби и специфики поврзани со дејноста на Бирото за развој на образованието. Во спротивно, иако за нас неприфатливо, но според „обрасците“ на однесување во државата и решавање на проблемите со притисоци, информираме дека ќе ги запреме нашите секојдневни активности и ќе ги повикаме на поддршка сите соработници (наставници, директори, воспитувачи, стручни соработници …), додаваат од БРО.

Во реакцијата се наведува дека го поддржуваат Факултетот во залагањата да обезбедат соодветни услови за настава, наместо да бара „привремено“ решавање на проблемот во „привремените објекти“ на Бирото за развој на образованието, во кои нема услови за настава.

– Исто така, се прашуваме, дали можеби „привременото решение“ е првиот чекор „атрактивната“ локација на „привремените објекти“ да прерасне во „повеќенаменски објект“ и трајно решение за, за сега, непознати намени, додаваат од Бирото.