Божиќниот пост започнува секоја година на 28 ноември и трае до 7 јануари, односно до Божиќ, денот на раѓањето на Исус Христос. Строг пост (на вода) е само во среда и во петок, додека маслото и виното се дозволени во понеделник, вторник и во четврток, а риба може да се јаде во сабота и недела.

Божиќниот пост трае 40 дена и е втор по должина на траење, веднаш по велигденскиот. Во однос на „строгоста“ за употреба на храна, божиќниот пост е „поблаг“ бидејќи дозволува користење вино, масло за јадење и риба.

Бидејќи ова е период на нагли промени во начинот на исхрана, нутриционистите советуваат оброците да се планираат однапред, така што дневното мени содржи овошје и природно цедени сокови; салати од свежа или кисела зеленчук, како и јадења од варен, парен или динстуван зеленчук, особено мешунките (грашок, леќа, грав, наут, боранија), кои имаат низок гликемиски индекс, а обезбедуваат доволно енергија за многубројни дневни активности.

Особено не е лесен постот на вода, кога покрај избегнувањето на сите намирници од животинско потекло (месо, млеко, јајца…), се забранува и храна што има масло во себе, како и приготвување на јадењата со масло.

Сепак, има многу идеи за посни јадења, како и оние на вода, а ние ви предлагаме посно мени на вода за една недела.

Понеделник

Појадок: сендвич од леб, печена пиперка, свеж кромид, магдонос и оригано

Ручек: супа од зеленчук – варен зеленчук со зачини и печени компири

Вечера: салата од варен зеленчук (варена пченка, свеж кромид, домат, пиперка и зачини).

Вторник

Појадок: качамак (како прилог, по желба додајте свеж или варен зеленчук)

Ручек: варен бел грав (потребни состојки се бел грав, кромид, морков, сушена пиперка, брашно, мелена црвена пиперка и сол)

Вечера: мусли од овесна снегулки со овошје и со сок.

Среда

Појадок: посна пита со печурки на вода

Ручек: супа од праз и посно ризото со парчиња соја на вода

Вечера: посен ролат со зеленчук

Четврток

Појадок: леб и мешана салата (грав и свежа пиперка со кисели краставички, кромид и соја сос)

Ручек: супа од домати со посни тестенини; боранија, но без масло, згуснете ја со пасиран компир

Вечера: на парче леб намачкајте домашен џем или мед и како прилог со тоа испијте чај

Петок

Појадок: салата од компири и моркови на вода

Ручек: печурки на вода

Вечера: тортилја на вода и со неа туршија, кисела зелка или печени пиперки

Сабота

Појадок: манастирска пита на вода

Ручек: шпагети со кечап и зеленчук

Вечера: паштета од зеленчук и леб (за паштетата потребни ви се компири, моркови, пашканат, кромид, сенф, лук, вода, сол и зачини по вкус).

Недела

Појадок: кнедли од компири на вода

Ручек: грашок без запршка, згуснат со брашно или со компир

Вечера: колачи со блитва

Секако, секогаш можете да додадете меѓуоброци ако сакате во текот на постот на вода, на пример, за ужина земете свежо или сушено овошје, исто така, тука се и брзите деликатеси какви што се овошен компот, житарки со јаткасти плодови или сутлијаш на вода. А дополнителни нијанси на вкус можете да постигнете со додатоци во вид семки од сончоглед, разни зачини, мелен лен, цимет…