Болницата во Митровица е без потребните лекови, предупредува директорот на Клиничкиот болнички центар Златан Елек. Тој потсетува дека од 2021 година, кога била одбиена последната јавна набавка, центарот нема континуирано снабдување со толку потребните лекови. Снемува кислород, а сосема се истрошени и залихите на лекови за пациентите со онкологија, кои ги има се повеќе. Им недостигаат потребните терапии кои им значат живот, посочува Елек, пренесува Тајм.рс.

– Ни недостигаат лекови, така е, последниве три години работиме на залихи од кога Албин Курти е на власт. Не е дозволено внесување на било каков вид на лек во КБЦ. Сега можам да тврдам дека КБЦ и населението овде се соочуваат со хуманитарна катастрофа, ако вака продолжи – вели Елек. Движењето меѓу централна Србија и областите на северот на Косово и Метохија е ограничено поради блокадата на преминот Јариње, преку кој може да се излезе, но не и да се влезе на север. На пунктот Брњак кај Зубин Поток од 5 октомври е можно да се движи во двата правци, но пракса е лековите, парите и другите потреби и трансакции да се вршат преку Јариње. Според полицијата, пунктот Јариње се уште е блокиран за влез од централна Србија поради полициски претрес на теренот, објави РТС.