Необичен оглас за работа привлече огромно внимание на интернет, откако компанија за вештачка интелигенција објави дека бара 10 лица кои ќе бидат платени околу 1.500 фунти месечно за тестирање нова функција поврзана со интимно задоволство, пренесува „Лед бајбл“.

Компанијата „Џои АИ“ бара кандидати кои, како што наведуваат, се „комуникативни, внимателни и не се срамат“ за улогата што ја нарекуваат „консултант за мастурбација“.

Според објавените информации, избраните кандидати ќе работат четири недели, а можат да аплицираат полнолетни лица од Велика Британија и САД.

Нивната задача ќе биде да ја тестираат новата функција наречена „Дневно водено мастурбирање“, која користи глас генериран со вештачка интелигенција за да ги води корисниците низ искуството.

Покрај самото тестирање, учесниците ќе треба да пополнуваат прашалници и да бележат како користењето на функцијата влијае врз нивното расположение, нивото на стрес, квалитетот на сонот и самодовербата.

Компанијата бара луѓе кои умеат детално да ги опишат своите чувства и искуства, а во огласот стои дека кандидатите треба да можат да се изразуваат „подобро отколку што познавач на вино опишува вкус“.

Тестерите ќе оценуваат дали гласот создаден со вештачка интелигенција одговарал на расположението, како и дали евентуални технички проблеми влијаеле врз искуството.

„Џои АИ“ е платформа која им овозможува на корисниците да создаваат виртуелни партнери со вештачка интелигенција и самите да ја одредуваат нивната личност и односот што ќе го имаат со нив.

По големото внимание што го привлече огласот, компанијата дополнително се пошегува на социјалните мрежи и напиша:

„Не се потребни препораки. Веруваме дека вашето долгогодишно искуство зборува само за себе.“

Заинтересираните кандидати треба да пополнат краток прашалник во кој одговараат на прашања како: „Зошто сакате да учествувате?“ и „Што се надевате дека ќе научите за себе?“

Од компанијата изјавиле дека веќе добиле повеќе од 100 илјади пријави, а нивната цел е луѓето подобро да разберат како интимните навики влијаат врз нивниот секојдневен живот и психичка состојба.