Помина на владина седница законот за нефер трговски практики, информира вицепремиерот Фатмир Битиќи.

Во објавата на Фејсбук Битиќи објаснува дека со законот се уредуваат условите и начинот како ќе се врши трговија со земјоделски и прехранбени производи.

-Се регулираат 26 нефер трговски практики во синџирот на снабдување на земјоделски и прехранбени производи. Нема да се дозволи да се користи моќта на одредена компанија врз другите компании. Очекуваме да влијае во намалување на цените на земјоделските и прехранбените производи, а со тоа и на квалитетот на производите. Надоместоците кои сега се наплаќаат во договорниот однос меѓу купувач и добавувач, кои надоместоци сериозно влијаат на малопродажната цена на штета на потрошувачите, ќе се сметаат за забранета нефер трговска практика – вели во обајвата Битиќи.

Вицепремиерот додава дека со законот ќе се зголеми предвидливоста и сигурноста за работа и на добавувачите и на купувачите.

-Република Северна Македонија е единствена земја во регионот која со овој закон се приближува кон легислативата на земјите членки на Европската Унија, бидејќи истиот е резултат на директива на ЕУ, дополнително е чекор напред кон зацврстување на компетитивноста на домашниот пазар преку креирање на предвидлива и фер бизнис клима – пишува Битиќи.