Во ерата кога дигиталната содржина го обликува нашето секојдневно размислување, Кина одлучи да постави нови стандарди за онлајн инфлуенсерите. Новите регулативи се насочени кон креаторите кои дискутираат за чувствителни теми како што се медицината, финансиите и образованието, барајќи од нив да имаат потврдени универзитетски дипломи или професионални акредитиви пред да објавуваат содржина.

Целта на оваа мерка е јасна: борба против дезинформациите и обезбедување стручни совети од квалификувани лица. Влијателните лица кои немаат соодветни академски квалификации би можеле да се соочат со казни до 100.000 јуани, што е приближно 12.180 евра, објавува „Економик тајмс“.

Покрај самите креатори, платформите за социјални медиуми стануваат одговорни и за проверка на образовните квалификации пред корисниците да можат да објавуваат содржини на професионални теми. Меѓу засегнатите платформи се најголемите кинески услуги, вклучувајќи ги Douyin (кинеската верзија на Tикток), Bilibili и Weibo.

Критичарите предупредуваат дека таков потег, иако корисен во борбата против лажните информации, би можел да ја ограничи креативноста и слободата на говорот, особено за независните поединци кои можеби немаат формално образование, но поседуваат професионално искуство. Од друга страна, многу корисници на интернет ја поздравуваат иницијативата, нагласувајќи дека експертизата треба да биде поважна од популарноста.

„Време е луѓе со вистинска експертиза да го водат разговорот“, коментираше еден корисник на Weibo.

Овој потег на кинеските власти е потсетник дека популарноста на социјалните медиуми не е исто што и експертизата. Во ерата кога информациите се шират со молскавична брзина, потврдувањето на кредибилитетот преку дипломи, лиценци и сертификати станува клучно за сигурна и одговорна онлајн комуникација.