Белата куќа го употреби хитот на Сабрина Карпентер на начин што предизвика бројни реакции. Администрацијата на Доналд Трамп ја искористи нејзината песна „Juno“ како звучна подлога во видео што промовира депортации спроведени од Американската служба за имиграција и царина (ИЦЕ). Во видеото се појавуваат снимки од протести против ИЦЕ и монтажа од повеќе апсења, со акцент на физичките позиции во кои службениците ги приведуваат лицата. Објавата е придружена со опис: „Дали сте го пробале ова? чао-чао.“ (англ. “Have you ever tried this one? Bye-bye”).

Контекстот на самата песна ја зголеми контроверзноста. Во „Juno“ Карпентер го изговара стихот „have you ever tried this one?“ како дрзок алузивен предлог за сексуална поза. На нејзината турнеја „Short n’ Sweet“, пејачката секојпат ја менува позата токму во тој момент од песната, што е целосно спротивно од начинот на кој Белата куќа ја употреби музиката во политичкиот видео-материјал, пренесува „Just Jared“.

Според податоци на „CBS News“, речиси половина од лицата притворени од ИЦЕ немаат криминално досие. Владините извештаи дополнително наведуваат дека повеќе од 65.000 луѓе биле задржани во притворските центри на ИЦЕ низ САД. Овие бројки ја нагласуваат чувствителноста на моментот во кој музиката на популарна изведувачка се користи во видео што поддржува депортации.

Сабрина Карпентер сè уште нема реагирано на користењето на нејзината песна во оваа политичка објава. Истовремено, Оливија Родриго неодамна јавно го критикуваше Министерството за внатрешна безбедност поради користење на нејзина музика на социјалните мрежи, што укажува на поширока тенденција на судири меѓу уметниците и државните институции поради ненajавено и непозволено користење авторска музика.