Барса на состанок со Раиола: Се преговара за трансфери на тројца фудбалери
Светски познатиот агент Мино Раиола во наредните денови треба да пристигне во Барселона на средба со раководството на каталонскиот клуб.
Челниците на тимот од „Камп Ноу“ се заинтересирани за дури тројца фудбалери на агентот, а тие се Ерлинг Халанд, Матијс де Лихт и Нусаир Мазрауи. Иако финансиски не стои добро, Барселона на секој начин се обидува да го засили тимот и преговара со потенцијални засилувања.
Подготвени се да потрошат огромни пари, а најголем предизвик е ангажирањето на напаѓачот на Борусија Дортмунд, Халанд. Покрај надоместот од 75 милиони евра, клубот кој сака да ангажира одличен норвешки напаѓач ќе треба да издвои огромни пари за плата и бројни провизии, а се претпоставува дека трансферот би можел да чини над 300 милиони евра.
Исто така, ни де Лихт нема да биде евтин. Тој е обврзан со договор со Јувентус, а неговата цена е околу 70 милиони евра. Единствен на кого нема да му треба надомест во текот на летото ќе биде мароканскиот десен бек Мазрауи на кому му истекува договорот со Ајакс.
Барса има навистина големи планови, но прашање е дали ќе може да ги поднесе огромните трошоци, особено кога се знае дека долговите на клубот одамна надминаа една милијарда евра.