Бабиќ пред мечот со Кадетен: Спортот ги признава само победниците
Во вторник (22 февруари) со почеток од 18.45 часот против Кадетен Шафхаузен во салата „Боро Чурлевски“ составот на Е. Пелистер ќе го игра својот осми натпревар сезонава во рамките од групата „Д“ во Лигата на Европа.
Тренерот на Е. Пелистер, Жељко Бабиќ вели дека се анализирани противниците, кои се нивните специјалности, на која позиција се добри и кои се нивните специфични движења.
Низ видео анализи и тренинзи битолачни ќе се обидат да го најдеме најдоброто за нивното издание и да ја изведат најдобрата тактичка подготовка за дуелот против Швајцарците.
– За разлика од минатата година сега малку сме во полесна резултатска позиција кога говориме за табелата, но сметам дека во спортот нема полесни позиции, туку имате една цел која не смее да варира, а тоа е победата. Без разлика дали сте први или петти, спортот ги признава само победниците, па така јас како тренер и моите играчи размислуваме на таков начин и така се подготвуваме, а на крајот ќе видиме дали ќе успееме на крајот во она кое го сакаме.
Кој го следи Е. Пелистер, знае дека играчите кои играат тука имаат страшен карактер, ангажман, дисциплина, одговорност и сакаат секогаш да победат. И покрај сите проблеми кои ги имавме во Франција, ракометарите покажаа еден неверојатен ментален интензитет. Секако, го загубивме натпреварот, не сум во целост задоволен и среќен поради тоа, но еден дел од мене е задоволен затоа што знам дека сите играчи, вклучувајќи ме и мене тука како тренер заедно со стручниот штаб, дадовме максимум за да победиме, но ете, не успеавме во тоа. Ама покажавме вистински карактер и тоа е нешто со сигурно го краси Е. Пелистер оваа година – вели Бабиќ.