Во изминатиов период, Аpple TV+ забележа огромен успех со голем број продуцирани документарни филмови и проекти фокусирани на музичката индустрија. Според сајтот „Deadline“, следниот предизвик на стриминг платформата е документарен филм чија цел ќе биде истражување на извонредната шест-децениска историја и почетоците на музиката во една од најголемите филмски франшизи некогаш – Џејмс Бонд.

EXCLUSIVE: Apple is planning a doc that takes a deep dive into the music of one of the great movie franchises: James Bond 007 https://t.co/J785cDaEWe

— Deadline Hollywood (@DEADLINE) December 15, 2021

Долгометражниот филм насловен „The Sound of 007“ ќе биде во режија на Мет Вајткрос, а во продукција на Џон Батшек, заедно со MGM, Ventureland и Eon Productions (наградуваниот продуцентски тим зад документарниот филм за Џејмс Бонд, „Everything or Nothing: The Untold Story of 007“).

– „The Sound of 007“ заминува зад објективот, внурнувајќи се длабоко во една од најголемите филмски франшизи во историјата, почнувајќи од генезата на „Dr. No“ и легендарната тематска песна „007“, па сè до „No Time to Die“, комбинирајќи емотивни интервјуа со материјал од неверојатната архива на Џејмс Бонд. – вели официјалното известување на официјалната 007.com страна.

Светската премиера на документарецот ќе се случи во октомври 2022 година, на денот 60-годишнината од филмската франшиза посветена на тајниот агент, Џејмс Бонд.

„The Sound of 007“ ќе ѝм се придружи на листа наградувани документарни филмови и серии, вклучително и „Boys State“ (добитникот на главната награда од жирито на Sundance Film Festival); „The Me You Can’t See“ (повеќеделна документарна серија од ко-креаторите и извршните продуценти Опра Винфри и принцот Хари); „1971: The Year That Music Changed Everything“ (нова документарна серија која прикажува како променливите бранови на историјата влијаеле врз музичките икони од тоа време), како и многу други.