По првиот настап во сала оваа сезона на 20 јануари во Архус, Данска, каде што го освои второто место со скок од 7,38 метри, македонскиот атлетчар Андреас Трајковски настапи на атлетскиот митинг во Горзов, Полска.

Нашиот натпреварувач во дисциплината скок во далечина блесна со одличен резултат од 7,82 метри, резултат вреден 1099 бода според таблицата на Светска Атлетика.

Со овој скок Трајковски го освои третото место на митингот, кој е со сребрена етикета од континенталните митинзи под покровителство на Европска Атлетика, и уште еднаш покажа дека се наоѓа во одлична форма на самиот почеток на сезоната.

Овој резултат ќе придонесе да се искачи високо на Европската ранг листа која ќе се ажурира во понеделник.

Првото место на митингот во Горзов му припадна на Лука Херден од Германија со скок од 8,18 метри, додека втор беше Лестер Лескеј од Шпанија (8,03 метри).