Иако Вашингтон најави повлекување на околу 5.000 американски војници од Германија, американските бази во земјата и понатаму остануваат клучен дел од воената инфраструктура на САД и НАТО во Европа.

Во Германија моментално има околу 40 американски воени објекти, претежно лоцирани во јужниот и југозападниот дел на земјата. Дел од нив служат како логистички и командни центри, други за борбени операции и обука, а некои имаат и улога во нуклеарната стратегија на НАТО, пишува „Дојче веле“.

Најголемата американска база надвор од САД е Рамштајн во покраината Рајнланд-Пфалц. Базата претставува главен центар за транспорт на војници, оружје и воена опрема кон Блискиот Исток, Африка и Источна Европа. Истовремено, таму се наоѓа и седиштето на американските воздухопловни сили во Европа, како и важен центар на НАТО за воздушен надзор.

Рамштајн има значајна улога и во операциите со американски дронови, бидејќи преку базата се пренесуваат сателитски сигнали за мисии на Блискиот Исток. Во нејзина близина се наоѓа и Ландштул, најголемата американска воена болница надвор од САД.

Втората најголема американска воздухопловна база во Германија е Шпангдалем, која главно се користи за борбени мисии. Таму се стационирани борбени авиони Ф-16 кои служат како брза интервентна сила на НАТО и дел од заштитата на источниот фронт на Алијансата.

„Испратете ги на исток“ – Полска е подготвена да ги прими американските војници од Германија

Стратешка улога имаат и базите во Штутгарт и Визбаден. Во Штутгарт се наоѓаат Европската и Африканската команда на САД, од каде што се координираат американските воени активности во Европа и Африка. Во Визбаден, пак, е сместено седиштето на американската копнена војска за Европа и Африка, а таму се координира и дел од воената поддршка за Украина.

Во Баварија се наоѓаат Графенвер и Хоенфелс, едни од најважните НАТО центри за обука во Европа. Таму секоја година илјадници војници учествуваат во воени вежби, тренинзи со вистинска муниција и симулации на урбани борби.

Посебно внимание привлекува и базата Бихел во Рајнланд-Пфалц, за која се верува дека е единствената локација во Германија каде што се складира американско нуклеарно оружје во рамки на програмата за „нуклеарно споделување“ на НАТО.

Американските бази во Германија постојат уште од крајот на Втората светска војна, а нивното значење дополнително се зголемило за време на Студената војна. Во 1980-тите во Западна Германија биле стационирани повеќе од 250.000 американски војници.

Иако бројот на американски војници денес постепено се намалува, базите и понатаму имаат огромно стратешко значење за САД. Тие и натаму се користат за поддршка на американските операции на Блискиот Исток и во Африка, како и за зајакнување на источниот фронт на НАТО кон Русија. Воедно, американското воено присуство претставува и важен економски фактор за делови од Германија, особено во регионите каде што се наоѓаат базите.

Америка ќе повлече околу 5.000 војници од Германија, објави Пентагон