Тревис Кинг, американскиот војник кој побегнал во Северна Кореја, бил затворен поради тепачка во Јужна Кореја пред да ја премине границата. Судските документи покажале дека тој бил вмешан во тепачки и удрил во полициски автомобил во Сеул. 23-годишниот војник неодамна бил ослободен и требало да се врати назад во САД, пред да успее да избега, пишува „Би-Би-Си“.

Тој се приклучил на турнејата на Заедничката безбедносна област и побегнал во Северна Кореја. Пјонгјанг засега не го коментира случајот.

Останува нејасно кои биле неговите намери да ја мине границата. Американските власти рекоа дека тој го направил тоа „намерно, по своја волја“ и изразија загриженост за неговата благосостојба.

Тој бил казнет со 5 милиони вони (3.950 долари) за „постојано шутирање“ на задната врата на полициско возило и „пцуење“ кон полицајците кои се обидувале да го приведат.

Локалните извештаи, цитирајќи официјални претставници, велат дека тој бил ослободен на 10 јули, откако одлежал два месеци затвор поради обвиненијата за тепачка, но не дале повеќе детали. По ослободувањето, тој бил ставен под воено набљудување, кое траело околу една недела во Јужна Кореја.

Тој бил придружуван до аеродромот во Инчеон, во близина на Сеул, на лет назад во САД, каде што требало да се соочи со дисциплинска постапка.

Но, тој не се качил во авионот. „Кореа тајмс“, цитирајќи службеник на аеродромот, објави дека тој пристигнал сам на влезната врата бидејќи на воените полицајци не им било дозволено да го придружуваат до авионот.

На портата, тој наводно му пришол на службеник на „Американ Ерлајнс“ и тврдел дека му го снемало пасошот. Вработен во авиокомпанијата потоа го придружувал надвор од полето за поаѓање.

Откако се разделил со неговата придружба, тој го напуштил терминалот за да тргне кон обиколка на демилитаризираната зона, или ДМЗ, меѓу Северна и Јужна Кореја, каде што странците можат да ја посетат преку туристички компании.

Не е јасно како Кинг успеал да се качи на една од овие тури, бидејќи вообичаено се потребни три дена за поединец да биде овластен за едно од овие патувања, кои обично се внимателно следени.

Мајката на Кинг, Клодин Гејтс, изјави за „Еј-би-си“ дека не може да замисли нејзиниот син да прави такво нешто. Тој „мораше да биде без ум“, рече таа.