Гувернерот на Народната банка, Трајко Славески, учествува на годишниот состанок на Конституенцата на Меѓународниот монетарен фонд (ММФ) и Светската банка, кој годинава се одржува во Варна, Бугарија, под мотото „Претворање на неизвесноста во долгорочна можност“.

Во фокусот на дискусиите се макроекономската и финансиската стабилност во услови на глобална неизвесност, дигиталната трансформација, продуктивноста, финансиската вклученост и позицијата на европските економии во светските синџири на вредности.

Во рамки на настанот, Славески одржа билатерални средби со претставници на ММФ и Светската банка, меѓу кои извршниот директор на Конституенцата во ММФ, Јерун Клик, заменикот на извршниот директор Марникс ван Рај и потпретседателката на Светската банка за Европа и Централна Азија, Антонела Басани.

Од Народната банка информираат дека на средбите било нагласено оти зачувувањето на ценовната стабилност останува главен предуслов за одржлив економски раст и стабилен финансиски систем, особено во услови на засилени геополитички ризици и брзи технолошки промени.

-Народната банка внимателно ги следи домашните и меѓународните економски текови и ги презема сите неопходни мерки за одржување на ценовната и финансиската стабилност, со што се зајакнува довербата во монетарниот систем и се обезбедуваат стабилни услови за економски развој- истакнал Славески.

На состаноците се разговарало и за отпорноста на финансискиот систем, актуелните макроекономски предизвици, влијанието на геополитичките случувања и улогата на дигиталната трансформација во поттикнувањето на растот и продуктивноста. Притоа е потврдена и успешната соработка меѓу Народната банка, ММФ и Светската банка во спроведувањето на реформите и јакнењето на институционалните капацитети.