Израелските власти не ѝ дозволиле влез во земјата на делегација на синдикални претставници од Грција, која патувала кон Западниот Брег по покана од палестинската страна, а потоа ја депортирале, пренесува Катимерини.

Министерството за надворешни работи на Грција веднаш реагираше и изрази „загриженост“ за ситуацијата.

„Ја изразуваме нашата загриженост поради одлуката на израелските власти да им го одбијат влезот и да ги депортираат грчките државјани, претставници на синдикати, чија крајна дестинација беше Рамала, откако беа поканети од палестинската страна. Грчките државјани за кои станува збор ги исполнија сите услови за влез во земјата и пред надлежните власти ја пријавија целта на својата посета“, стои во сооопштението.

Министерство не соопшти дополнителни детали за околностите под кои бил одбиен влезот.

Западниот Брег, познат и како Јудеја и Самарија, е територија на Блискиот Исток на западниот брег на реката Јордан. По распаѓањето на Османлиското Царство, оваа територија станува дел од Британскиот Мандат Палестина. По Арапско-израелската војна од 1948 година, Западниот Брег е освоен и припоен од Јордан. Територијата останува под јорданска власт до 1967 година, кога во текот на Шестдневната војна, Израел го освојува Западниот Брег. Со исклучок на Источен Ерусалим, Западниот Брег не е припоен од Израел.

Според Договорот од Осло од 1993 година, конечниот статус на Западниот Брег треба да биде предмет на иден договор помеѓу Израел и Палестина.

Западен Брег: Живот во страв од израелските доселеници