Полскиот премиер Доналд Туск вчера предупреди дека растечкиот политички судир меѓу Варшава и Киев е стратешка грешка која ризикува да им нанесе штета на двете земји, пренесува „Ројтерс“.

Претседателот на Полска, Карол Навроцки, во петокот му ја одзеде на украинскиот претседател Володимир Зеленски највисоката државна почест, по што тројца поранешни украински претседатели и други високи функционери ги вратија своите државни одликувања на Полска.

Навроцки го поништи Орденот на Белиот орел, откако Зеленски предизвика незадоволство во Полска со преименување на единица на украинската армија по Украинската востаничка армија, националисти кои за време на Втората светска војна извршиле масакри врз Полјаци.

Проевропскиот Туск беше реизбран за премиер во 2023 година, откако ја предводеше коалицијата што ја порази националистичката партија Право и правда, со која е поврзан Навроцки.

„Вклучувањето во конфликт меѓу политичари во Полска и во Украина е стратешка грешка која ќе им наштети на двете страни: економски, геополитички и репутациски. А во политиката, како што знаеме, грешка е полоша од злосторство. Во разговорите со моите европски партнери се трудам да ги минимизирам загубите и да ги намалам тензиите. Ова не е лесна задача“, напиша Туск во објава на „Икс“.

Зеленски изјави дека Украина и Полска не можат да бидат „ништо друго освен партнери и пријатели“, додавајќи дека политичкиот судир би можел да доведе до „многу опасна ескалација“.

„Нашите војници сами го избираат херојското име на својата единица, а како претседател и како врховен командант морам да ги поддржам. Без Украина, никој нема да може да ја одбрани Полска. Тоа едноставно е невозможно“, рече тој.

Зеленски по пошта го врати Орденот на Белиот орел што му го додели Полска