Новата анализа на порталот „ПиНКАМП“, кампинг-платформа на германскиот автомобилски клуб АДАК, покажува дека цените за кампување во Европа повторно растат, особено во популарните медитерански дестинации, пренесува „Феникс магазин“.

Според извештајот за 2026 година, просечната цена за една ноќ во камп во главната сезона изнесува околу 49 евра за семејство составено од две возрасни лица и едно дете до 10 години, со вклучено место за камп-приколка или кампер. Шаторите не биле опфатени во анализата.

Хрватска на врвот по цени

Најголемо внимание привлекува Хрватска, каде што просечната цена за ноќевање во камп во летната сезона достигнува околу 73 евра. Со тоа, земјата е поскапа и од Швајцарија, каде просекот изнесува околу 61 евро.

Високи цени се бележат и во Италија, каде што просечното ноќевање чини околу 63 евра. Податоците покажуваат дека цените во Хрватска пораснале за околу 12 проценти во споредба со претходната година, додека најголем раст е забележан во Шпанија, со зголемување од 15 проценти.

Директорот на „ПиНКАМП“, Уве Фрерс, објаснува дека причината за ваквите разлики е високата побарувачка во најпосетените туристички региони.

„Особено во многу бараните медитерански земји, големата меѓународна побарувачка се соочува со ограничени капацитети, што доведува до повисоки цени“, изјави тој.

Северна Европа и Германија значително поевтини

За разлика од медитеранските дестинации, кампувањето во северна Европа и Германија е значително поевтино.

Според анализата:

– Норвешка – околу 38 евра по ноќевање
– Шведска – околу 40 евра
– Германија – околу 41 евро
– Холандија – околу 43 евра
– Франција – околу 46 евра
– Данска – околу 51 евро
– Обединето Кралство – околу 53 евра
– Австрија – околу 56 евра

И покрај тоа, во Германија цените исто така пораснале за околу 7 проценти.

Луксузните кампови уште поскапи

Разликите се уште поизразени кај камповите со пет ѕвезди, познати како АДАК Суперплац, кои нудат базени, ресторани, анимации и дополнителни содржини.

Во оваа категорија:

– Шпанија – околу 98 евра
– Хрватска – околу 95 евра
– Австрија – околу 92 евра
– Италија – околу 91 евро

За споредба, во Германија луксузните кампови чинат во просек околу 57 евра по ноќевање.

Кампување покрај море значително поскапо

Анализата покажува дека локацијата има големо влијание врз цената. Камповите на крајбрежје се во просек за 36 проценти поскапи од оние во внатрешноста на земјите.

Во Хрватска разликата изнесува околу 30 проценти, додека во Франција кампувањето покрај море е дури 49 проценти поскапо.

Како да се заштеди при кампување

Стручњаците препорачуваат неколку начини за намалување на трошоците:

– патување надвор од главната сезона, кога цените се и повеќе од 50 проценти пониски
– избор на кампови подалеку од море
– избегнување на непотребни луксузни содржини
– внимателно споредување на вкупните трошоци, вклучувајќи такси и дополнителни услуги

Иако кампувањето и понатаму се смета за поевтина алтернатива на хотелите и апартманите, податоците покажуваат дека Хрватска повеќе не е синоним за евтин одмор, бидејќи големата побарувачка и популарноста на Јадранот значително ги зголемиле цените.

Бесплатно кампување во Грција? Внимавајте – освен парична казна, може да завршите и во затвор