Иранскиот голман Алиреза Бејранванд е главниот херој на репрезентацијата на Иран на Светското првенство, откако и синоќа блесна во ремито против фаворизираната Белгија (0:0).

Она што го издвојува овој 33-годишен чувар на мрежата од повеќето  фудбалери е неговата необична и инспиративна животна приказна, која претставува вистински пример за спортска и човечка истрајност.

Бејранванд пораснал во номадско семејство во иранската провинција Лорестан, каде од најрана возраст бил вклучен во тешки физички работи и чување овци. Љубовта кон фудбалот ја покажувал уште како дете, но тоа често било извор на несогласувања со неговиот татко, кој сметал дека фудбалот не е сигурна иднина. Поради тоа, во повеќе наврати му ја уништувал спортската опрема и се обидувал да го одврати од тренинзи.

Она по што Бејранванд најмногу го привлекува вниманието на Светското првенство се неговите неверојатни исфрлања на топката со рака, а таа вештина корените ги влече уште од детството.

🚨The Iranian national team goalkeeper, Alireza Beiranvand, signs the real Iranian flag for one of his fans. pic.twitter.com/5JwUy8qSxM

— The Saviour (@TheSaviour) June 21, 2026

Тој претходно открил дека како дете со пријателите играл локална игра наречена „дал паран“, која се заснова на натпреварување во фрлање камења на што е можно поголема далечина. Токму преку оваа игра, несвесно развил исклучителна сила во рамениот појас, поради што денес со леснотија ја фрла топката преку половина терен и директно ги проигрува напаѓачите.

Решен да го оствари својот сон, Бејранванд во младоста донел голема одлука, позајмил пари за билет и заминал во Техеран. Бидејќи во главниот град пристигнал без средства за живот, со месеци живеел како бездомник, спиејќи пред клупските простории каде се обидувал да добие проба. За да преживее, работел различни физички работи, меѓу кои во фабрика за облека, автоперална, пицерија, а извесно време бил и ноќен чистач на улици.

Just look at this save from Alireza Beiranvand 🤯! #BELIRN #Iran pic.twitter.com/jsa6jyWmCA

— The Final Whistle (@Rufus_45) June 21, 2026

Пресвртот во неговиот живот се случил кога тренерите на клубот Нафт Техеран го забележале неговиот потенцијал и висина. Од тој момент неговата кариера почнала нагло да се развива, што набрзо го довело и до статус прв голман на репрезентацијата на Иран.

Широката светска јавност го запозна на Светското првенство во 2018 година, кога на натпреварот против Португалија одбрани пенал на Кристијано Роналдо. Тоа беше момент што симболично ја заокружи неговата животна приказна, од момче што спиело на улиците на Техеран до голман што на најголемата сцена запре едни од најдобрите фудбалери во историјата.

Синоќа повторно ја воодушеви иранската јавност со импресивни одбрани на натпреварот против Белгија, кога ги запре ударите на Де Брујне, Лукаку и останатите и донесе нов бод за својот тим, кој го доближува до пласман во нокаут-фазата.

ВИДЕО | Контроверзна изјава на Раде Богдановиќ: Црнците по 60 минути на теренот веќе немаат концентрација

ФОТО | Иранците оставија емотивна порака во Лос Анџелес: Нека преовладува мирот и почитта меѓу сите народи

Составот на Иран вчера беше највозрасниот во историјата на Мундијалите

ВИДЕО | Нова сензација на Мундијалот: Зеленортски Острови освоија бод и против Уругвај