Американскиот сенатор Линдзи Греам, еден од најблиските сојузници на претседателот Доналд Трамп, почина на 72-годишна возраст. Републиканскиот сенатор од Јужна Каролина почина вчера „по кратка и ненадејна болест“, соопшти неговата канцеларија, објави „Ројтерс“.

Почина сенаторот Линдзи Греам, еден од најголемите сојузници на Трамп

Греам се вратил од Украина кратко пред неговата смрт, каде што во петокот во Киев се сретнал со украинскиот претседател Володимир Зеленски. Во објава на социјалните мрежи, Зеленски рече дека веста за смртта на Греам „длабоко го растажила“.

„Линдзи беше вистински бранител на слободата и вредностите што го прават нашиот свет побезбеден. Тој работеше на важни иницијативи што можеа да го доближат мирот, вклучително и построги санкции против Русија. Америка и светот загубија решителен лидер. Нашето сочувство оди до семејството на Линдзи, неговите најблиски и до сите што имаа чест да работат со него“, напиша Зеленски.

Греам беше избран во Сенатот на САД во 2002 година, а оваа година имаше намера да го освои својот петти шестгодишен мандат. Тој беше еден од највлијателните републикански сенатори за прашања од одбраната и надворешната политика. На неговата официјална веб-страница се наведува дека тој „постојано се залагал за резултати во војната против тероризмот што ги штитат долгорочните национални безбедносни интереси на Соединетите Американски Држави“.

Тој успеа да остане близок со Трамп иако понекогаш не се согласуваа. Доналд Трамп се збогува со Греам со објава на неговата социјална мрежа „Трут Соушуал“.

„Тој беше еден од најголемите луѓе и сенатори што некогаш сум ги познавал. Секогаш работеше и беше вистински американски патриот. Многу ќе ни недостига Линдзи! Многу е тажно!“, напиша Трамп.

Иако првично беше критичен кон Трамп кога бизнисменот од Њујорк влезе во политиката, Греам на крајот стана еден од неговите најцврсти сојузници. Тој беше меѓу ретките републиканци кои успеаја да останат блиску до претседателот иако повремено јавно не се согласуваше со него. Така, во 2025 година, тој ја критикуваше одлуката за помилување на поддржувачите на Трамп кои упаднаа во зградата на американскиот Капитол на 6 јануари 2021 година.

Нетанјаху: Линдзи разбра дека безбедноста на Израел и Америка се неразделни

Поранешниот британски премиер Борис Џонсон рече дека е „шокиран и длабоко тажен“ од веста за смртта на Греам и го опиша како „голем американски патриот и пријател на Обединетото Кралство“.

„Тој беше цврст бранител на западните вредности и неуморно работеше за мир во Украина. Многу ќе ни недостига“, рече Џонсон.

Израелскиот премиер Бенјамин Нетанјаху, исто така, му оддаде почит на Греам.

„Линдзи сфати дека безбедноста на Израел и Америка се неразделни. Тој го посвети својот живот на одбрана на Америка, зајакнување на нашиот сојуз и одбрана на слободниот свет. Израел загуби еден од своите најголеми пријатели. Америка загуби голем патриот. Јас загубив драг пријател“, напиша Нетанјаху во објава на Платформа X.

Американски сенатор: Ако договорот пропадне, Трамп ќе го преземе Ормускиот Теснец и ќе наплаќа