САД и Иран водат индиректни преговори насочени кон продолжување на двонеделното примирје по неговото истекување на 22 април, објави „Гардијан“.

Портпаролката на Белата куќа, Керолајн Левит, вчера негираше дека САД „формално“ побарале продолжување на примирјето, но нагласи дека Вашингтон останува „многу ангажиран“ во преговорите. Таа додаде дека втор круг разговори „многу веројатно“ ќе се одржи во Исламабад и дека Белата куќа има „добри очекувања“ за можен договор, и покрај претходниот неуспех на преговорите.

Во меѓувреме, Пакистан започна нова рунда дипломатски напори, при што делегации патуваат низ регионот за да обезбедат поддршка за мировен договор. Асим Мунир ја предводеше пакистанската делегација во Техеран за да пренесе порака од Вашингтон и да помогне во организирање на нова рунда разговори меѓу САД и Иран, во која учествуваше и министерот за внатрешни работи Мохсин Наќви.

Паралелно, премиерот на Пакистан Шехбаз Шариф започна четиридневна турнеја низ Саудиска Арабија, Катар и Турција со цел да ја зајакне регионалната поддршка за мировните напори.

Иако извештаите сугерираат дека двете страни се наклонети кон продолжување на примирјето, претседателот Доналд Трамп изјави дека негово продолжување можеби и не е потребно за постигнување конечен договор.

САД и Иран се враќаат на преговарачката маса во Пакистан

Иранскиот портпарол на МНР, Есмаил Багаеи, рече дека размената на пораки меѓу Вашингтон и Техеран продолжила и по неуспешната рунда од 21-часовни разговори во Исламабад.

Според извори во Техеран, Иран бара прекин на израелските напади врз Либан како предуслов за нова рунда преговори со САД, додека, пак, Бенјамин Нетанјаху изјави дека операциите против Хезболах продолжуваат и дека израелската армија ќе ја прошири „безбедносната зона“ во јужен Либан.

Началникот на израелскиот Генералштаб Ејал Замир најави продолжување на офанзивата со цел елиминација на присуството на Хезболах јужно од реката Литани.

Двајца либански функционери изјавија дека е можно наскоро да биде објавено примирје меѓу Израел и Хезболах, иако деталите сè уште не се познати.

Американската војска соопшти дека поморската блокада на иранските пристаништа е целосно спроведена, при што биле вратени девет бродови, меѓу кои и танкер под кинеска сопственост, што се обидел да помине низ Ормускиот Теснец.

Иран: Ќе ги потопиме сите американски бродови ако САД ја преземат контролата над Ормускиот Теснец

Ирански воен претставник предупреди дека Техеран може да го запре трговскиот проток во Персискиот Залив доколку блокадата продолжи, додека, пак, американскиот секретар за финансии Скот Бесент најави дополнително заострување на финансиските санкции кон Иран.

Кина изрази противење на поморската блокада, иако Трамп тврди дека постигнал договор со кинескиот претседател Си Џинпинг да не испраќа оружје во Иран, тврдење кое Пекинг го негираше.

Трамп, исто така, предвиде брз крај на војната, наведувајќи дека е можен договор или еднострано повлекување на САД по нанесената штета врз иранската војска, додека цените на нафтата останаа високи поради неизвесноста околу конфликтот.