Австралискиот шампион во УФЦ со македонско потекло Алексадар Волкановски (36) даде интервју за шпанска „Марка“ за неговиот претстоен меч со Илија Топурија (27), шпанскo-грузискот борец.

Во интервјуто Волкановски зборува и за своето етничко потекло, како и за мечот со Топурија, во кој Австралиецот ќе ја брани титулата во перолесна категорија, во Анахејм, Калифорнија (САД), в сабота.

Еве како Волкановски одговори на прашањето на „Марка“ дали бил во Шпанија и што мисли за таа земја.

– Никогаш не сум бил во Шпанија, па сакам да одам и да направам турнеја низ Европа, што е нешто што никогаш не сум го направил. Јас сум Македонец и Грк (преку неговите родители), па тоа е нешто што би сакал. Отсекогаш сум сакал да ја посетам Европа. И мислам дека посетата на Шпанија би била неверојатна – вели Волкановски кој е роден во Австралија, а чиј татко е роден во селото Беранци, Македонија, а мајка му е од Грција.

Еве што вели Волкановски за мечот со Топурија:

– Мислам дека можам да ја добијам борбата на сите нивоа. Очигледно, тој има моќ и тоа го прави опасен. Добар е во бокс. Мислам дека би можел дури и да победи во секоја ситуација, но дури и да е само бокс-меч, ќе го победам. Мислам дека ќе го елиминирам на половина меч… Мислам дека ќе ја завршам работата рано, но сакам навистина да се чувствувам како шампион пред да го докрајчам – вели Волкановски.