Кошаркарите на Навико Академија ФМП се последни полуфиналисти на завршниот турнир од Купот „Благоја Георгиевски-Буштур“ откако во четвртфиналето во драматичен натпревар го победија минатогодинешниот финалист Еуро Никел 2005 со 91:88.

„Академците“ подобро го отворија наптреварот, поведоа со 16:5, но по тајм-аутот на Горан Самарџиев,тимот од Кавардарци со вратија во игра правејќи серија 5:14 со која дојдоа до минус два (21:19).

Втората четвртина во најголем дел помина во израмнета игра се до финишот, кога Еуро Никел во 18 минута поведе со 41:45. Во последните две минути од втората четвртина Академија ФМП направи серија од 8:0 и на одмор замина со предност од 49:45. Серијата продолжи и во третата четвртина со тројката на Бакоч за 52:45, а кон крајот на третиот дел предноста се зголеми на 16 поени (69:53).

Кавадарчани не се предадоа, Димчевски погоди две тројки, по што во последната четвртина успеаја целосно да се вратат во игра израмнувајќи на 79:79. Но, тоа не ги исплаши кошаркарите на Навико Академија ФМП кои беа поприсебни во финишот и дојдоа до водство 88:82 кое се покажа недостижно за Еуро Никел.

Били Ајви со 23 поени, седум скока и пет асистенции беше најпрецизен во победничкиот тим, каде што Филип Бакоч постигна 20, а Стефан Крстајиќ 19 поени. Кирил Николовски со 17 поени беше најефикасен кај Еуро Никел.

Академија ФМП во првото полуфинале утре ќе се сретне со ТФТ, а во второто полуфинале силите ќе ги одмерат МЗТ Скопје и Феникс.