Нова студија открива дека ајкулите што живеат во водите околу Бахамите се позитивни на кокаин. Истражувачи од Бразил, Чиле и Бахамите пронајдоа траги од кофеин и лекови против болки во нивните тела, што е последица на сè пораспространетото загадување на морето.

Откривањето на овие супстанции на тропска локација што се смета за идилична и недопрена е особено загрижувачко бидејќи покажува дека на Земјата има многу малку места каде што дивите животни можат да избегаат од човековото влијание, пишува „Саенс алерт“ / „Science Alert“.

– Фармацевтските производи и нелегалните дроги сè повеќе се препознаваат како нови, загрижувачки загадувачи во морските екосистеми, особено во областите на забрзана урбанизација и туристички развој. Нивниот постојан прилив не само што претставува ризик за морскиот биодиверзитет, туку и за здравјето на луѓето преку консумирање морска храна и изложеност на рекреативни води – наведуваат истражувачите во својот труд.

Научниот тим анализираше примероци од крв од 85 ајкули фатени околу Елеутера, еден од најоддалечените острови на Бахамите. Кај 28 од нив беа пронајдени различни видови дроги. Истражувачите веруваат дека ајкулите и другите морски организми се изложени на последиците од загадената отпадна вода.

Кофеинот бил најчесто детектирана супстанца, но две ајкули исто така беа позитивни на кокаин. Научниците се сомневаат дека ајкулите можеби ги каснале пакетчињата кокаин што биле фрлени во морето.

– Тие гризат работи за да ги истражат и така завршуваат изложени“, изјавил биологот Наташа Восник од Федералниот универзитет во Парана во Бразил.

Ајкулите биле фатени во близина на популарни места за нуркање и крстарење, па затоа се претпоставува дека непрoчистената отпадна вода од бродовите, како и поголемите количини отпадни води предизвикани од урбаниот развој и туризмот воопшто, придонесуваат за овие резултати.

Ова е првпат кофеин да биде откриен кај ајкули насекаде во светот и првпат да биде пронајден кокаин во организмите на ајкулите на Бахамите. Два лекови против болки, ацетаминофен и диклофенак, исто така беа идентификувани во примероците од крв.

Експертите се сè повеќе загрижени за овој проблем. Студија објавена минатата година откри дека крстосувачките бродови што пловат по Арктикот, практично пловечки градови, испуштаат антибиотици, лекови и други супстанции во водата. Ова има ефект врз целиот живот во овие води. Траги од кокаин претходно се пронајдени кај ајкули покрај брегот на Бразил, што дополнително предупредува дека океанот се третира како огромна депонија за течен отпад.

Она што сè уште не е познато е какви здравствени ефекти имаат овие супстанции врз морскиот свет. Во оваа студија, истражувачите проценија некои метаболички маркери кај ајкулите, сугерирајќи дека изложеноста на лекови може да доведе до зголемен стрес и зголемена потрошувачка на енергија додека нивните тела се обидуваат да ги елиминираат токсините.

Ги издале пораки на „Скај“: Кокаин скриен во српската амбасада во Португалија?