АГРОМЕТЕО: Колку подолго се задржи студеното време, толку побогат род ќе имаме
Разладувањето на атмосферата, со врнежи од дожд и снег, со пониски дневни температури, во изминатата седмица, го забавија или го одржуваа на исто ниво пролетното будење на овошките. Тоа е добро за овој период од годината сеедно што температурите беа подпросечни, информира Ангелко Ангелески, советник за агрометеорологија во УХМР во најновиот извештај.
Зимата сѐ уште календарски трае и не е невообичаено во овој период од годината да има и негатвни температури. Ниските минимални утрински температури кои се очекуваат во текот на викендот и наредната седмица, особено во првите неколку дена, од агрометеоролошки аспект можат да причинат штети доколку во регионите каде е веќе расветан бадемот, сливата и раните сорти кајсии температурите паднат под -5 оС, што е температура која е пониска од издржливоста на овошките во оваа фаза.
Во повисоките региони каде не е отпочната вегетацијата добро е што ќе ги одржи подолго време во мирување овошките и виновата лоза, затоа што колку подолго се одржува оваа фаза толку се поголеми шансите да имаме поуспешна реколта.