Министерот за образование и наука Арбер Адеми ја демантираше веста дека училиштата ќе продолжат да работат на 18 мај. Од утринава по групите на социјалните мрежи почна да кружи информација, наводно уредба со законска сила донесена од Владата на седница што се одржала вчера дека сите основни и средни училишта ќе ја продолжат учебната 2019/2020 година на 18 мај, под посебни услови.

Адеми експресно ја дематираше информацијата на својот профил на фејсбук, а од Владата велат дека вчера не одржале седница.

Во лажната информација беше наведено Владата го задолжува МОН да изготви протоколи за безбедно продолжување на учебната година и во координација со директорите на училиштата да обезбеди да се превземат превентивни мерките за заштита од коронавирусот, да се почитуваат препораките на Институтот за јавно здравје, да се воведе настава во три смени за да се постигне социјална дистанца, да се одржува хигиената, наставниците и учениците задолжително да носат маски, а наставниот час наместо 40 да трае 30 минути.