АБА2 лига: Слобода Ужице е наредниот противник на МЗТ Скопје
Откако ја запишаа и четвртата победа сезонава во АБА2-лигата против Хелиос (70:69), денеска МЗТ Скопје Аеродром ќе го одигра и вториот натпревар од вториот „балон“ во ова регионално натпреварување.
„Металците“ (учинок 4-1) од 13.00 часот на турнирот во Бања Лука ќе ги одмерат силите против Слобода Ужице.
Играчите предводени од тренерот Ѓорѓи Кочов имаат шанса со нова победа против српскиот претставник да останат во трка за врвот на табелата каде што „штрковите“ се на петтата позиција со девет бодови, само два помалку од водечкиот Златибор Чајетина (Србија).
Кочов не беше задоволен од финишот на дуелот со словенечката екипа која што можеше многу лесно и покрај високата негатива да направи целосен пресврт. Стратегот на македонската екипа се надева нема да се повторат такви глупости и неодговорност во следните предизвици.
Се играат уште два меча во текот на денешниот ден, од 17.00 часот Златибор Чајетина ќе се соочи со Студентски Центар, а од 21.00 часот Младост Земун се соочува со Спарс Сараево.