Денеска во 15 коло од Еврокупот кошаркарите на Тренто на гостински терен минимално со 94:93 беа подобри од литванскиот претставник Лиеткабелис.

Ова е значајна победа за италијанскиот претставник во трката за една од позициите кои водат во плејофот на натпреварувањето.

Моментно Тренто е на четвртата позиција (9-6), а во следното коло на 27 јануари ќе го пречека, водечкиот во генералниот пласман, турскиот Бешикташ (11-4).

На денешниот дуел најефикасни во редовите на Тренто беа Американците ДеВанте Џонс со 24 поени (10 скока) и ДЏ Стјуард со 22 поени.

Македонскиот репрезентативец Андреј Јакимовски придонесе во победата со седум поени, три скока и две асистенции за 25:02 минути игра на паркетот во Паневезис.

На спротивната страна прв стрелец беше Американецот Џамел Морис со 24 поени, следен од Естонецот Кристиан Куламае со 17 поени и четири асистенции.