За време на пандемијата на коронавирусот во светот се зголеми популарноста на естетската хирургија на лицето поради фактот дека луѓето кои се опоравуваат од последиците од овие операции се заштитени од љубопитните погледи, бидејќи носат маски или работат од дома.

Додека многу компании во светот се принудени да затворат поради пандемијата, клиниките за естетска хирургија продолжуваат да работат, со превентивни мерки, како што се тестирање на коронавирус и построги стандарди за хигиена.

Како што наведува Би-Би-Си, клиниките во САД, Јапонија, Јужна Кореја и Австралија имаат зголемување на бројот на пациенти, кои се изложуваат на естетска операција на носот, ботоксирање и затегнување на лицето, како и пополнување на усните.

Естетски хирург од Тексас посочува дека сега има многу повеќе пациенти, кои работат од дома во голем број, и не треба да го земат предвид потребното време за закрепнување дома при планирање на операцијата.

– Тие, всушност, можат да заздравуваат дома по операција на носот или затегнување на лицето, а кога излегуваат можат да носат маска, вели хирургот.

Во Јапонија официјално немаше изолација, но вонредната состојба беше на сила до 31 мај, па од населението беше побарано да остане дома, но сепак се зголеми бројот на пациенти заинтересирани за естетски интервенции.

Поради тоа, јапонското здружение за естетска медицина издаде предупредување дека естетските зафати не се неопходни во голем број случаи и апелираше до заинтересираните да не одат на операција за време на пандемијата со цел да се спречи ширењето на инфекцијата, пренесува Би-Би-Си.