Полицијата ги идентификуваше учесниците во тепачката со стапови во селото Облешево, која синоќа беше објавена на социјалните мрежи. Станува збор за жители на струмичкото село Баница, кои продавале земјоделски производи.

Портпаролот на СВР-Штип, Гордана Панајотова во пишано соопштение информира дека настанот е пријавен вчера во 12:15 часот во полициската станица Кочани.

„На автобуското стојалиште во село Облешево, поради меѓусебни недоразбирања околу паркирање на возила, бил нарушен јавниот ред и мир со физичка пресметка помеѓу две групи на лица, сите од струмичкото село Баница при што биле употребени и дрвени предмети“, се вели со соопштението.

За сите учесници во тепачката се изготвени записници за констатиран прекршок по член 11 став 3 од Законот за прекршоци против јавниот ред и мир.