Украинскиот претседател Володимир Зеленски денеска изјави дека стои зад предлогот испратен до Русија за прекин на огнот под услов Москва да ги запре сите напади врз енергетската инфраструктура, објавија украинските медиуми.

Во своето вечерно видео обраќање, Зеленски рече дека предлогот бил доставен до Москва преку САД. Тој исто така рече дека заедно со американските преговарачи продолжува работата за безбедносните гаранции, кои ги нарече клуч за траен мир.

„Доколку Русија е подготвена да ги запре нападите врз нашата енергетска инфраструктура, ние ќе бидеме подготвени да одговориме со иста мера. Овој предлог беше доставен до руската страна со посредство на Американците, рече тој.“

Минатата недела, Зеленски понуди почитување на прекинот на огнот за Велигден под слични услови. Имено, мнозинската православна Русија и Украина го слават Велигден следната недела.

Сепак, по новите руски напади, тој рече дека Русија одговорила на предлогот со распоредување беспилотни летала Шахед од ирански дизајн.

Москва реагираше ладно на предлогот на Зеленски минатата недела, велејќи дека претпочита сеопфатен мировен договор.

Откако тројца беа убиени синоќа во напад врз пристаништето Одеса на Црното Море, Зеленски денеска рече дека се чини дека Русија не е подготвена да се согласи на велигденско примирје.

„Неколкупати ѝ предложивме примирје на Русија барем за Велигден, тоа посебно време од годината. Но, за нив сите времиња се исти. Ништо не е свето“, порача украинскиот претседател.

Зеленски: Подготвени сме за преговори