Зеленски верува дека нема да има голема војна против Украина
Украинскиот претседател Володимир Зеленски не гледа зголемен ризик од војна и покрај тоа што Русија ги призна самопрогласените републики на исток.
-Веруваме дека нема да има голема војна против Украина, рече украинскиот лидер во Киев по средбата со естонскиот колега Алар Карис.
Тој додаде дека во случај на дополнителна ескалација ќе биде воведена вонредна состојба во земјата.
Зеленски ги отфрли барањата на претставниците на сепаратистите за повлекување на силите од деловите на Доњецк и Луганск, што се под контрола на Киев.
-Не разговараме со нив. Не знаеме кои се тие, рече украинскиот лидер.
Рускиот претседател Владимир Путин синоќа ја призна независноста на двата сепаратистички региона прогласувајќи ги за независни држави и веднаш потоа нареди во нив да заминат руски војници, за чување на мирот.