Украинскиот претседател Володимир Зеленски денес изјави дека ситуацијата на фронтот во војната со Русија е моментално најдобра во последните 10 месеци, повикувајќи се на проценка на британската разузнавачка служба МИ6.

Зеленски рече дека, и покрај тековните борби, украинските сили во моментов се во „мал плус“, ослободувајќи околу 20 квадратни километри територија повеќе отколку што напредувале руските сили, објави УНИАН.

„Фронтот се држи. Ситуацијата е тешка, но најдобра во последните 10 месеци“, изјави тој, заблагодарувајќи им се на украинските единици за, како што рече, постигнатите резултати.

Зборувајќи за предлогот за велигденско примирје, Зеленски рече дека Русија сè уште не покажала никаква подготвеност да прифати таква иницијатива.

„Го пренесовме нашето барање до американската страна. Не знам дали ќе имаат можност да ја пренесат својата порака до Русите. Ќе видиме. Нашиот предлог за прекин на огнот за Велигден останува“, додаде Зеленски.