Украинскиот претседател Володимир Зеленски предложи досегашниот министер за дигитална трансформација Михаило Федоров да стане нов министер за одбрана на Украина, објави „Киев Индепендент“.

Според него, назначувањето на новиот шеф на украинската Служба за надворешно разузнавање ќе биде објавено наскоро.

„Денес започна значајно внатрешно ресетирање, промени насочени кон тоа Украина да стане поотпорна… Минатата година, државните институции покажаа и добри резултати што треба да се зајакнат и проблеми што не можат да се пренесат во новата година“, додаде Зеленски.

Украинскиот претседател Володимир Зеленски го назначи Олег Ивашченко, кој беше началник на Службата за надворешно разузнавање (СВР), за нов началник на Главната разузнавачка управа (ГУР).

„Од денес, Олег Ивашченко ќе продолжи да ѝ служи на нашата земја и да ги извршува задачите за ограничување на рускиот воен потенцијал на позициите на украинската воена разузнавачка служба“, напиша Зеленски на својот Телеграм канал.

Зеленски го објави новиот шеф на кабинет на местото на Јермак

Претходно, тој соопшти дека Кирил Буданов ќе биде шеф на неговиот кабинет, на местото на Андриј Јермак, со што станува таканаречениот „втор најмоќен човек“ во Украина. Оставката на Јермак (на 28 ноември) и неговата замена од Буданов се директно поврзани со еден од најголемите корупциски скандали во украинската историја, познат како Операција Мидас.