– Сакам двојно повеќе зеленило, двојно помалку бетон!
– Скопје да има развиен јавен превоз со нови линии!
– Да се направи место каде што ќе можат да се дружат средношколци. Во моментов нема ниедно!
– Да се ослободат сите заробени многугодишни дрвја по скопските улици кои полека умираат. Да се засадат дрвја онаму каде има празно место.
– Сакам Град Скопје да им помогне на бездомниците!
– Повеќе велосипедски патеки, повеќе пешачки зони!
– Да се направи пешачка зона во центарот на градот, односно, забрана на возење на автомобили, а во централното градско подрачје да возат само туристички автобуси, редуциран број на автобуси да минуваат низ Центар ( Рекорд), автомобили на Брза помош и ПП возила. Нека е пешачка зона! Како Виена на пример.
– Сакам во 2023 во Град Скопје да има локални избори за да избереме нов градоначалник.
– Во 2023 година во Град Скопје да донесат иницијатива за градење на вистински тоалет, а не ТоиТои кабини.
– Инспектори кои се достапни 24/7 и не се плашат да дојдат по пријава од нас.

Ова се само дел од 50-те новогодишни желби на скопјани, кои ги собра граѓанската иницијатива „Зелен хуман град“ и кои неделава треба да им ги однесат на градоначалничката Данела Арсовска, советниците и институциите, за, како што велат од ЗХГ, гласовите на граѓаните да се слушнат во Градот.

Од граѓанската иницијатива најавуваат и дека ќе купат вистинска елка, која ќе ја засадат во Градски парк пред Град Скопје и ќе ја накитат со желбите, а потоа, ќе ги поканат сите советници и вработени да ги прочитаат желбите, за да видат што посакуваат граѓаните.

Желбите на граѓаните можат да се прочитаат на следниот линк:  https://mojgrad.mk/elka/