Градоначалникот на Скопје, Орце Ѓорѓиевски информираше дека вчера заедно со колегата од Сарај, Мухамед Елмази и министерот за животна средина Мухамед Хоџа, го посетиле депонираниот простор покрај реката Вардар на патот кон селото Рашче за кое најави дека ќе биде пренаменето во голем парк.

„Овој запуштен простор ќе прерасне во голем, модерен и уреден парк, со хортикултурно и партерно уредување, зелени површини и содржини за рекреација, одмор и дружење на жителите од овој дел на Сарај“, истакна Ѓорѓиевски.

Исто така, Ѓорѓиевски додаде дека наскоро треба да започне и реконструкција на мега-паркот во Сарај, кој, како што вели, со децении бил оставен во негрижа.

„Ова место има природна убавина, има потенцијал и заслужува грижа. Не заслужува отпад, запуштеност и заборав, туку живот, зеленило и простор во кој граѓаните ќе уживаат. Како што ветив, продолжуваме со изградба на паркови, зелени површини и јавни простори кои му даваат нова вредност на градот“, нагласи градоначалникот.