Автомобилот и влезот во домот на градоначалникот на бугарското село Бистрица, Самуил Попов, биле намерно запалени рано утрината, нешто по 1:30 часот. Попов изјави дека го разбудил силен звук сличен на експлозија, поради што првично помислил дека удрил гром во близина, објави „Новините“.

Неколку моменти подоцна, тој сфатил дека возилото паркирано во дворот на неговата куќа гори. Потоа чад почнал да го исполнува скалиштето, по што станало јасно дека не е запален само автомобилот, туку и влезната врата од куќата. Според Попов, и возилото и влезот биле запалени речиси истовремено.

Градоначалникот изјави дека забележал мотоцикл како го напушта местото веднаш по инцидентот. Врз основа на тоа што го видел, тој смета дека двајца влегле во дворот, истуриле запалива течност врз автомобилот и врз влезната врата, а потоа ги запалиле.

Пожарникарските екипи брзо интервенирале и го изгаснале пожарот.

Попов, четиригодишната ќерка и сопругата спиеле на третиот кат

Во моментот на подметнувањето на пожарот, Попов, неговата сопруга и нивната четиригодишна ќерка спиеле на третиот кат од куќата. На првиот кат живеат неговиот внук и мајката на внукот, а таа вечер во куќата имало и неколку пријатели на внукот.

Министерството за внатрешни работи потврди дека случајот е под активна истрага и дека веќе се преземаат оперативни мерки.

ФОТО | Концерт што долго ќе се памети: Здравко Чолиќ ѝ подари тричасовна магија на публиката во Скопје

Маскирани луѓе пред општинската зграда

Попов потсети и на претходен инцидент од јули минатата година, кога маскирани луѓе се појавиле пред општинската зграда во селото, и рече дека не ја исклучува можната поврзаност меѓу двата случаи.

Тој посочи дека на 11 јули јавно го поставил прашањето каде завршуваат средствата собрани од кириите за објекти во центарот на селото. Според него, не добил јасно објаснување, по што поднел и официјално барање до администрацијата на реонот Панчарево и до Општина Софија. Во одговорот било наведено дека приходите од кириите постојат, но дека се управуваат преку посредник.

Во кого се сомнева Попов?

Попов изјави дека од летото наваму не добил нови закани. На прашањето дали се сомнева во некого конкретно, тој наведе дека неодамнешните медиумски извештаи биле фокусирани на нелегално истурање земјени маси во околината, но нагласи дека нема конкретни информации или претпоставки за тоа кој би можел да стои зад подметнувањето пожар.

Во врска со претходниот случај со маскирани луѓе, додаде дека, колку што му е познато, сторителите сè уште не се идентификувани.

Самуил Попов моментално го извршува својот втор мандат како градоначалник на Бистрица. Првпат бил избран како независен кандидат, а сега е на функцијата во рамки на квотата на коалицијата ПП–ДБ.