Портпаролката на руското Министерство за надворешни работи, Марија Захарова, денеска се осврна на вестите за влошеното здравје на некогашниот воен командант на босанските Срби, Ратко Младиќ, кој одлежува казна доживотен затвор.

„Видовме вести за хоспитализацијата на Ратко Младиќ во Хаг поради наглото влошување на неговата здравствена состојба. Сметаме дека би била правилна одлука Резидуалниот механизам да го ослободи Ратко Младиќ од хумани причини“, рече Захарова.

Синот на Ратко Младиќ, Дарко, вчера се огласи по повод дезинформациите за смртта на неговиот татко на социјалните мрежи, кажувајќи дека се измислица.

„Ратко Младиќ е жив. Неговата состојба е иста како вчера, ни подобра ни полоша“, наведе Дарко Младиќ.

Тој додаде дека сè уште не се знае дали и кога тим српски лекари ќе го прегледаат Младиќ, кому поради лошата здравствена состојба му е нарушен говорот.

Засега нема најави или барања од одбраната Младиќ да биде пуштен на лекување во болница во Белград. Воениот командант на војската на Република Српска, Младиќ е осуден на доживотен затвор за геноцид, злосторства против човештвото, кршење на законите или воените обичаи за време на војната во БиХ во периодот 1992-1995 година.