Една од најпознатите манекенки од 1990-тите и почетокот на 2000-тите, Ева Херцигова (53), која стекна светска слава благодарение на легендарната кампања „Вондербра“, се омажи за италијанскиот бизнисмен Грегорио Марсијаж по 25 години врска.

Двојката ги размени заветите во сабота, 11 јули, во Торино, а свадбената прослава се одржа во три дела.

Црковната венчавка се одржа во црквата Сан Вито, која беше украсена со омилените цвеќиња на невестата – бели и светло портокалови рози. Во согласност со традицијата, Ева беше придружувана до олтарот од нејзиниот татко.

За оваа пригода, таа носеше бохо фустан со средна должина од француската модна куќа „Ланвин“, со сандали украсени со нежни панделки. Својот романтичен изглед го надополни со елегантна фризура и класичен букет бели цвеќиња.

Грегорио Марсијаж пристигна кратко пред церемонијата во „астон мартин“, во придружба на нивните три сина – 18-годишниот Џорџ, 15-годишниот Филип и 12-годишниот Едвард.

По црковната церемонија, Ева и Грегорио се упатија кон палатата Палацо Карињано во центарот на Торино, каде што се одржа граѓанската венчавка. Прославата заврши со здравица со шампањ и свадбен прием во познатиот торински ресторан „Дел Камбио“.

Веста за нивната венчавка се појави уште во мај, кога беше откриено дека двојката ќе се венча на 11 јули, по четврт век заеднички живот и три деца. Информацијата стана јавна откако градот Торино објави официјално известување за бракот.

Ева Херцигова и Грегорио Марсијаж се запознаа во 2001 година во приморскиот град Вариготи, во италијанскиот регион Лигурија. Моделот, претходно беше во брак со тапанарот на „Бон Џови“, Тик Торес.