За чистење апартмани на Јадранот сезонава се земаат и над 20 евра на час
Летната сезона на Јадранот сè уште е во полн ек, а и натаму се бараат работници во многу струки поврзани со хотелиерството и угостителството, пишува „Дневно.хр“. Според порталот, кој направил споредба на цената на трудот на хигиеничарите пред две години и сега, сопствениците на апартмани оваа сезона плаќаат двојно повеќе.
Препорачано
Саатнината кај хигиеничарите пред две години се движела од 8 до 10 евра, а само најдобрите работници и работнички стигнувале до 13 евра на час. Но, годинава за час работа се добиваат и над 20 евра, вели за „Дневно“ жена која работи како хигиеничарка на хрватското крајбрежје.
„За апартман од 80 квадратни метри, за кој ми требаат околу три часа, заработувам 60–70 евра, вели жената, која за хрватскиот портал зборуваше и пред две години околу тарифите.
Условите за работа се исти – работниот ден обично почнува во 10 часот наутро, веднаш по заминувањето на гостите, а до 14–15 часот се подготвува просторот за нови туристи. Во зависност од големината на објектот, работат по неколку лица истовремено за да се стигне рокот, додава таа.
