За Буџетот за 2026 година расправа собраниската комисија: Ќе добиеме ли за првпат конзервативна каса, пореално испланирана?
Во 2026 година се очекува понатамошно забрзување на реалниот раст на БДП на 3,8%, при што главниот двигател на растот е предвидено да биде домашната побарувачка, посочи министерката за финансии Гордана Димитриеска-Кочоска
Предлог-буџетот за 2026 година ја потврдува посветеноста на Владата кон стабилноста, предвидливоста и одговорното управување со јавните финансии. Овој буџет не е само документ со бројки и табели – тој е економска порака за раст, инвестиции и сигурност за граѓаните, компаниите и институциите.
Препорачано
-
1
-
2
-
3
Ова го истакна министерката за финансии Гордана Димитриеска-Кочоска во експозето по Предлог-буџетот за 2026 година пред Комисијата за финансирање и буџет во Собранието. Буџетот на расходната страна тежи 6,7 милијарди евра, а на приходната 6 милијарди.
– Во 2026 година се очекува понатамошно забрзување на реалниот раст на БДП на 3,8%, при што главниот двигател на растот е предвидено да биде домашната побарувачка, во услови на раст на бруто-инвестициите и потрошувачката. Бруто-инвестициите е предвидено да се зголемат за 8,4 проценти на реална основа, во услови на поинтензивна реализација на големите инфраструктурни проекти во јавниот сектор кои се во понапредна фаза, пред сè коридорите 8 и 10Д, како и инвестициите во железничкиот транспорт, енергетиката, земјоделството, образованието и здравството. Дополнителен двигател на бруто-инвестициите ќе биде и поддршката на општините за реализација на капитални инвестиции со цел порамномерен регионален развој и унапредување на животот на граѓаните – потенцираше министерката.
Претседателот на Фискалниот совет Абдулменаф Беџети рече дека генералната оцена за Предлог-буџетот за 2026 година е дека е конзервативен, односно и на страната на јавните приходи и на страната на јавните расходи е проектиран врз реални можности и насочен кон фискална консолидација.
– Вака поставен, буџетот ќе обезбеди и макроекономска стабилност. Во минатогодишното мислење за Буџетот за 2025 година, Фискалниот совет предложи и препорача на Министерството за финансии „да се воведе ограничување јавните расходи да можат да растат најмногу до висината на растот на номиналниот БДП“. Оваа препорака годинава е реализирана дури и поконзервативно, со проектиран раст на јавните расходи од само 2,6% – посочи Беџети.
Тој упати на тоа дека е потребна поголема вклученост на буџетските корисници при изготвувањето на буџетот.
