Дури и самиот збор „салата“ асоцира на здравје, па поради тоа често во неа додаваме различни состојки, без да обрнеме внимание на порциите, калориите и нутриентите. Идеалната салата треба да биде урамнотежена и да содржи околу 4-5 додатоци, кои пружаат различни вкусови и нутриенти.

Но, не мора да бидете нутриционист за да подготвите совршена комбинација – за почеток избегнувајте ги овие додатоци:

Пржени и похувани додатоци – за жал, крцкавиот и пржен кромид или тротилја чипс практично ќе ја претворат салатата во нездрава храна. Пржените производи можат на салатата да ѝ дадат крцкав вкус, но со него ќе добиете и значителна количина калории и преработени јаглехидрати.

Сланина – не само што сланината е богата со маснотии (само две резанки содржат околу 7 грама маснотии и приближно 100 калории), преработеното месо сè почесто се поврзува со ракот на дебелото црево. Ако сакате да подготвите салата со богат вкус, сланината заменете ја со пилешко.

Кашкавал – тој главно се состои од маснотии и содржи многу повеќе калории отколку што луѓето веруваат. Но, ако не можете без него, секако внимавајте на количината што ќе ја додадете во салатата. Не треба да е повеќе од една тенка резанка.

Суво овошје – може да го најдете во купечките салати најверојатно засладено со дополнителен шеќер, а голема е шансата во салатата да го има премногу. Исто така, овошјето во тек на дехидрација губи од својот волумен и дел од водата, поради што ќе добиете помала количина отколку во салатата да сте додале некое друго свежо овошје.

Кремасти преливи за салати – најчесто содржат сериозна количина калории, шеќер, вештачки додатоци, заситени масти и натриум. Ако салатата содржи многу повеќе состојки богати со калории (на пример, кашкавал и јаткасти плодови) секако прескокнете ги преливите и додајте малку лимонов сок. Витаминот Ц ќе му помогне на телото во апсорпцијата на железото од зеленчукот, а ако вкусот на лимон не се вклопува во салатата, можете да ѝ додадете малку маслиново масло кое е одличен извор на витамин Е и здрави масти.