Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – колач со кајсии.

– Кога летото ќе ни подари миризливи и сочни кајсии, нема подобар начин да ги искористиме од овој едноставен, а раскошно вкусен колач. Со својата мека текстура, кремаста внатрешност и нежна арома на ванила, овој десерт е вистинско уживање за сите сетила. Бадемите додаваат суптилна крцкавост, а кајсиите внесуваат природна свежина и овошна сладост во секој залак – порачува Бобе.

Состојки за колачот:

– 10 свежи кајсии, преполовени и исчистени од семки
– 3 јајца
– 120 г брашно
– 90 г шеќер
– 150 мл полномасно млеко
– 150 мл слатка павлака
– 40 г ливчиња од бадем
– 1 лажичка екстракт од ванила

За калапот:

– 1 лажица путер
– 1 лажица кафеав шеќер

Подготовка:

Загрејте ја рерната на 220 степени. Калапот за печење премачкајте го со путер и рамномерно посипете го со кафеав шеќер.

Измијте ги кајсиите, преполовете ги и отстранете ги семките, па наредете ги во калапот со пресечената страна нагоре. Во подлабок сад изматете ги јајцата и шеќерот додека добиете светла и пенеста смеса. Додајте ги млекото, слатката павлака и екстрактот од ванила, па кратко измешајте. Постепено додавајте го брашното, мешајќи додека смесата не стане мазна и без грутчиња. Прелијте ја смесата врз наредените кајсии. Одозгора рамномерно распоредете ги листовите од бадем.

Печете 20-30 минути, или додека колачот не добие убава златножолта боја и целосно се стегне.

Извадете го од рерна и оставете го да одмори околу 10 минути пред сервирање.

Послужете го колачот млак, со топка сладолед од ванила. Контрастот помеѓу топлиот, миризлив колач и ладниот сладолед создава совршена хармонија на вкусови и текстури. Секој залак носи дел од летната магија и уживање што долго се памети.

На здравје!

Гастрономско уживање од вештите раце на Бобе Јанкоска: Тиквички полнети со моцарела

Гастрономско уживање од вештите раце на Бобе Јанкоска: Џем од кајсии

Гастрономско уживање од вештите раце на Бобе Јанкоска: Тиквички полнети со моцарела